Una delegacion del govèrn colombian e una autra de la guerrilha de las Fòrças Armadas Revolucionàrias de Colómbia (FARC) comencèron ièr dimècres, a Oslo (Norvègia), las negociacions per assajar de resòlver lo conflicte que devasta Colómbia dempuèi gaireben mièg sègle. Uèi de ser, i aurà una conferéncia de premsa per avisar d’aquelas primièras convèrsas.

La session de negociacion que ven serà a L’Avana (Cuba), mas la data es pas estada fixada per ara.
 
S’agís del tresen assag de dialòg; las negociacions de 1980 e de 2002 capitèron pas.
 
Cada delegacion pòrta una trentena de negociaires. De la part de las FARC, i a los comandants de la guerrilha Iván Márquez e Jesús Santrich; sembla tanben que i participarà Tanja Nijmeijer, neerlandesa e membre de las FARC, en qualitat de traductritz.
 
L’oposicion colombiana critica fòrça durament aquelas negociacions: “Cal pas donar la man al grop armat quand l’armada e la polícia colombiana l’an encerclat.” Malgrat aquò, lo president colombian, Juan Manuel Santos, a dich que voliá far tot çò que siá possible per far participar las FARC a la vida politica e que mantendriá l’alta al fuòc fins a l’acòrdi final. Las FARC, de lor costat, an anonciat la fin de las sequestracions e an ja liberat totes los militars qu’avián presonièrs.
 
Aquò pòt èsser la fin de cinquanta dos ans de conflicte, e mai se lo darrièr assag de patz, de 2002, a l’iniciativa del president Andrés Pastrana, capitèt pas; d’un costat, perque l’ofensiva militara foguèt fòrça intensa e, de l’autre, perque las FARC cessèron pas de far de sequestracions.